*
top
Manamed
PrinterFriendly
Druckoptimierte Version
Menu
Startseite Startseite
Kursangebote Kursangebote
Klassische Massage Klassische Massage
Fussreflexzonenmassage Fussreflexzonenmassage
Bindegewebsmassage Bindegewebsmassage
Lymphdrainage Lymphdrainage
Med. Basiskurse Med. Basiskurse
Weiterbildungen Weiterbildungen
Über uns Über uns
Schulort Schulort
News News
Anmeldung Anmeldung
Links Links
Kontakt Kontakt
Schulordnung Schulordnung
Kalender Kalender
News-Text

Erfahren Sie Neues zur Massageschule

Sie können jeden Artikel ausdrucken oder an Freunde weiterleiten.

Muskellehre mal anders
20.11.2014 20:56 (1610 x gelesen)

S`Muskelmäärli...

„Vom tapferä sartorius und sim Schniderli“



S`isch ämol vor langer, langer Ziit, än schöna, lange Muskel gsi. Er isch stolz gsi druf, dass er dä längschti Muskel vom Körper gsi isch. Selbstbewundernd hät er sin Verlauf verfolgt, vo sim Ursprung a dä SIAS, also vo dä Spina iliaca anterior superior, quer öber dä Oberschenkel, bis abe zum Aasatz a dä oberä mediale Siitä vom Tibiaschaft. Und er isch au saumässig stolz gsi öber sin Name: Sartorius. Er hät zwor nöt gwüsst, was er bedütet, aber er hät immer gmeint, dass äs klingi wiä ä griechischi Inslä. S`hät ihn eifach an Sonnä, Meer und glücklichi Menschä erinneret.

Und obwohl er uf all das stolz gsi isch, ischer immer doch irgendwiä ä chli truurig gsi. Immer, wenn er uf diä starchä, dickä Vastis, dä chräftigi Rectus femoris glueget hät. Denn ischer sich immer wieder numä als än Mitäufer vorcho. Wiä so än „lange Lulatsch“, wo im Sport immer ä chli dänäbet stoht und zletscht innä Gruppä gwählt wird.

Klar, er hät fliisig mitgholfä bi dä Hüftflexion, dä Abduktion und Ussärotation. Jo sogar im Chnü, bi dä Flexion und Innärotation. Aber äbe... S`hät ihm eifach „s`Eigeni oder Bsonderi“ gfählt. Sogar dä schlanki gracillis hät zo damaliger Ziit – und hüt no in viilnä Kulturä, sich än Name gmacht als „Jungfrauähüeter“.

Nei, dä sartorius isch sich i därä gwichtigä Umgäbig oft recht verlorä vorcho.

Eines Tages, d`Sonne isch grad langsam rotgoldig hinter äm Schloss ufäm Hügel untergangä. Do ischer wiederämol mit äm Bei so mitglofä. Dä Wäg hät innäs chliis Städtli gführt. Vorämä altä Hüsli isch äs Mannli gsässä. Hät dä Chopf i d`Hend gstützt gha und truurig vor sich härä gstarret.

Dä Maa vom Bei, a dem dä sartorius sini Diänscht tue hät, isch stoh bliibä.

Und so hends erfahre, dass das truurigi Mannli dä Schnider isch. Dass er vom Chönig dä Uuftrag öbercho hät, s`schönschti Hochziitskleid z`naiä, wo`s je geh hegi. Und wenn er das schaffi, denn hetti er und sini Familiä uusgsorget. Und sie möstet niä meh Hunger liidä. Aber das sei unmöglich, das schaffi er nöd. Schliesslich, mit sim Ruggäliidä und so.. und am Obig wird’s frühä Dunkel .. und öberhaupt...

Jo, dozmol, do häts no kei Berninamaschinä geh. Und au dä Herr Osram hät erscht viil spöter för guets Liächt gsorget.

Und wo dä sartorius so dä verzwiifleti Schnider ghört und gseh hät, do ischäs ihm wiä än himmlischä Blitz vom Beckäkamm bis zor Tibia gfahrä. Und er hät plötzlich gwüsst, was sini Beschtimmig, siis Bsonderi isch...

Und a dem Tag isch dä „Schnidermuskel“ geborä wordä. Und alli Schnider uf dä Wält, hend jetzt zäme mit äm sartorius ä neui „Schni-

derära“ iiglütet.

Rasch sind d`Stüehl im Nähzimmer uf d`Siitä gschobä gsi. Dä Schnider hät sich uf dä Tisch unters Liächt gsetz – und dä sartorius hät ihm zomä bequemä Sitz verholfä.

Glücklich isch dä Schnider jetzt jedä Tag ufäm Tisch am Fenschter – und jedä Obig unter dä Pfunzlä gsässä, in siner neuä, bequemä Schniderhaltig. Und däbi hät er s`schönschti Hochziitskleid gnait, wo d`Welt je gseh hät.

          Und noch dä Arbät hät dä Schnider siin gliäbtä sartorius schö dehnt.
          Dodäzue hät er ä Streckig im Hüftglenk mössä mache. Er isch i dä
          Schrittstellig  härä gschtandä – dä Oberkörper uufrächt und noch vorn
          zeigend – und s`Chnü vom dehntä Oberschenkel hät fascht dä Bodä
          berüehrt. Und wenn er ganz guet gloset hät, denn hät er gmeint, äs
          wohlbefindlichs „hhmmm“ vom sartorius z`ghörä.

Und am Tag vo dä Hochziit, isch dä Schnider stolz und uufgregt i därä  illuschträ Gsellschaft gsässä. Er hät än ganz bsonderä Platz öbercho. Zuege, er isch ä chli nervös uf sim grossä Stuehl umägrutscht. Und wo dä chöniglichi Dessär serviert wordä isch, do hät er’s nümä uusghalte, so „aaschtändig“ z`sitzä. Er hät eifach sini Bei ufäzochä und isch im Schnidersitz ufäm Stuehl gsässä. Und däbi hät er immer wieder ämol liäbevoll und dankbar öber dä sartorius gschtrichä.

Und wenn sie nöt verchürzt, verletzt oder gar gschtorbä sind, denn naiet sie no hüt glücklich zäme.

Christian Lehner


Zurück Druckoptimierte Version Diesen Artikel weiterempfehlen... Druckoptimierte Version
Adresse_Manamed
Information und Anmeldung

Manamed
Massageschule
Thalerstrasse 43
CH-9422 Staad
Tel. 071 690 03 04*
text-bottom
Kontakt Massageschule  |  Impressum  |  Kursangebote Massageschule  |  Schulungsorte  |  Anmeldung Massageschule  |  Sitemap  |  © text & webdesign
Benutzername:
User-Login
Ihr E-Mail